Pesca decomisou case 800 quilos de marisco este ano
O furtivismo segue a ser un dos principais problemas que afecta ó sector marisqueiro da ría ferrolá. Pese a que o número de actuacións contra o furtivismo medrou considerablemente con respecto ó ano anterior, pola contra a cantidade de marisco decomisado e as actas de infracción levantadas descenderon.
REDACCIÓN FERROL
O balance de actuacións do Servizo de Gardacostas da Consellería de Pesca e Asuntos Marítimos durante o primeiro semestre do ano pechouse con máis de medio milleiro de intervencións a cargo da Unidade Operativa de Ferrol, unhas 170 máis das realizadas durante o mesmo período de 2005. Dun total de 528 actuacións, unha quinta parte delas, 115, remataron co levantamento de actas de infracción.
En plena crise do sector marisqueiro local, a acción dos ilegais é un factor máis que agrava a situación e unha das causas que a provocan, segundo denunciaron en reiteradas ocasións as confrarías da zona. Sen embargo, a cantidade de marisco ilegal incautada moitas veces grazas á colaboración dos vixiantes e mariscadores dos propios pósitos sufriu un significativo descenso respecto do exercicio anterior xa que dos 2.656 quilos de productos do mar decomisados pasouse a só 812. A metade deles foi de ameixa babosa (412), e en menor cantidade tamén se interceptaron ameixa fina (64 quilos), vieira (40) e berberecho (30). Outros 230 quilos máis están incluídos no capítulo doutras especies marisqueiras , ós que hai que engadir 36 máis de peixe.
Así mesmo, o servizo da vixiancia da Xunta requisou case un centenar de artes e aparellos de pesca, pouco máis dun terzo dos intervidos entre xaneiro e xuño do ano pasado. Entre eles destacan unha ducia de aparellos de enmalle, 24 nasas, 25 sachos, 6 raños e ganchas, 13 capachos, 13 buzos e un traxe de neopreno.
www.diariodeferrol.com
