Pesca ofrece aos mariscadores soldos moi por debaixo dos que eles pedían
Ferrolterra A nova positiva é que lles permiten alternar este salario coa actividade extractiva
Para decembro, a oferta é de 1.300 euros para cada barco a flote, cando se solicitaban 3.000.
(Firma: María Hermida | Lugar: ferrol)
Onte souberon a verdade. A Consellería de Pesca deu a coñecer os soldos fixos que lles ofrece aos mariscadores para sortear a crise de As Pías, un banco do que xa non se pode vender marisco en fresco ao estar contaminado. Aínda que Pesca falara dun plan de emprego ata o 2010, polo momento e á espera de novas reunións, só se ofrecen salarios fixos para os dous próximos meses.
Os soldos que ofrece Pesca son moito menores dos que pedían os mariscadores na proposta enviada á consellería. Así, ofértase un salario de 65 euros diarios tanto para mariscadores a flote como a pé. Se ben é certo que os de a flote pagaránselle como máximo vinte días ao mes mentres que para a pé só serán dez. E, con estas cantidades, as contas están claras: para as mariscadoras a pé, sumando os dous meses, ofrécense un máximo de 1.300 euros, e para os de a flote, nos dous meses, un máximo de 2.600. Sen embargo, o que pedía o sector eran 3.000 euros para todos os afectados no mes de decembro e outros 2.000 no de xaneiro.
A nova positiva é que se ofrece a oportunidade de alternar este traballo pagado (que consistirá en rexenerar os bancos) co marisqueo, sempre que non sexan ambos no mesmo día.
Link:www.lavozdegalicia.es
