«O edificio actual está xa moi vello, xa cedeu o chan e precisa de máis capacidade»
AGUSTÍN PÉREZ | Patrón maior de Cedeira
O inicio das obras de construción da nave dos exportadores de peixe de Cedeira era agardado polo pósito local como auga de maio. O patrón maior da confraría, Agustín Pérez, recorda que «levábamos cerca de catro anos agardando. Xa era hora».
-¿Que vai supor para o porto contar cunha lonxa nova?
-Esta é unha antiga demanda que tiñamos dende o pósito cedeirés, e que lle trasladamos en reiteradas ocasións aos dirixentes autonómicos da Consellería de Pesca. Vainos permitir ter máis capacidade para subastar produto, e evitar que en tempos de moito traballo, sobre todo en verán, algúns barcos se teñan que marchar a outros portos da Coruña.
-Aínda que se descoñece o deseño final das instalacións. ¿Como será a nova rula?
-Aínda hai moitas cousas por definir. Pero o proxectado e falado coa conselleira era habilitar dous espazos diferenciados dentro da rula, un para o percebe, que está entre as especies que máis se subastan aquí en Cedeira, e outro para o peixe fresco. Sen embargo, será unha sala diáfana, sen divisións mediante paredes, para que se alguén está ao percebe e quere tamén pescada, por exemplo, non se perda a outra poxa.
-A nivel de novidades nos servizos da rula, ¿que melloras traerá o edificio?
-Todo vai ser máis moderno e funcional, o que nos permitirá introducir comodidades como por exemplo as cintas transportadoras. Aínda que de momento non coñecemos ao detalle a distribución que terá a rula.
-¿O actual centro de poxas acusa xa o paso dos anos?
-Non estou seguro de cando foi construída esta lonxa, pero debe ter polo menos máis de vinte anos. Está moi vella, e presenta moitas deficiencias, xa cedeu o chan, por exemplo. E fainos falla máis capacidade. Calculamos que para o ano 2010 poidan estar en marcha as novas instalacións, se todo vai ben.
