Torcuato Teixeira: ´Hai uns anos que o único que fai o Goberno cando vai a Bruxelas é vender ao sector´
"Debemos ser o faime rir de Europa. O resto de países, vendo as cotas que ten España e escoitando aos membros do Executivo, dirán: 'estes señores, ou non teñen nin idea ou son uns hipócritas"
O secretario xeral da asociación de armadores PescaGalicia, Torcuato Teixeira. / víctor echave
A flota de arrastre de litoral atópase na maior encrucillada dos últimos anos: con poucos días de faena e escaseza de cotas de pesca despois da redución do 93% no cupo de lirio en augas do Cantábrico. O secretario xeral da asociación coruñesa de armadores PescaGalicia, Torcuato Teixeira, asegura que o Goberno e a CE están a levar ao sector á ruína pero advirte de que é o Executivo quen debe sacar á flota desta situación: "A Administración meteunos neste problema pola súa neglixencia ao negociar en Bruxelas e é quen debe solventalo"
MANUEL BARRAL | A CORUÑA Este ano preséntase duro para a flota galega de arrastre de litoral. Á redución de esforzo, días de faena, que conleva cada ano o plan de recuperación da pescada en augas ibéricas, en 2011 súmase a redución dun 93% do cupo de lirio, co cal a actividade do sector queda moi comprometida. O secretario xeral da asociación coruñesa de armadores PescaGalicia, Torcuato Teixeira, asegura que un cento de barcos só van poder faenar tres meses no ano.
-Como definiría o ano pasado para o arrastre de litoral?
-Foi moi complicado porque por primeira vez pechouse a pesquería da xarda, co cal moitos buques víronse obrigados a botar inxentes cantidades de pescado pola borda ao non poder traelas a terra, e a partir de xuño as posibilidades de captura de pescada limitáronse a unhas cantidades irrisorias, co que nos vimos na mesma situación. Houbo empresas que aguantaron mellor e outras peor pero todas remataron o ano peor do que o comezaron.
-Semella que 2011 tamén vai ser difícil. Cal cre que será a maior dificultade?
-As cotas de pesca seguen sendo deficitarias en relación a como están os stocks e ao que precisa a flota. Seguimos tendo o problema da reducción de esforzo, porque o plan de recuperación da pescada segue aí e séguesenos quitando días de actividade. Estamos practicamente en medio ano de traballo e ningunha empresa pode aguantar así.
-Fálase moito nas últimas semanas do tema do lirio, dese recorte do 93% nas posibilidades de captura. Que efectos vai ter?
-O fundamental é que rompe o equilibrio que había ata agora no caladoiro Cantábrico Noroeste. A cota non chega para máis dun mes e iso vai conlevar unha sobreexplotación dos outros recursos e un esgotamento moito máis rápido dos cupos de outras especies. Eso ademais vai afectar a outras flotas que faenan nesas augas.
-Hai algunha solución posible ou calquera que se intente, como a excepción á rebaixa da cota que propón a Xunta, chegaría tarde?
-Esa excepción é unha das posibilidades porque é a única forma de modificar ese regulamento da UE sobre os Totais Admisibles de Captura (TAC) e cotas. Pero a burocracia europea é moi lenta e hai que negociar con outros países para chegar a un consenso na modificación dese regulamento. Lamentablemente estamos ante un feito consumado e a curto prazo non se ve ningunha solución.
-Non hai alternativa?
-A medio prazo a solución é modificar o regulamento. A única opción factible, coa Administración española, é preparar un plan de rescate desta flota para poder aguantala en 2011, dado que non vai ter cotas para pescar.
-A opción de paradas subvencionadas sería factible ou son moitos meses a cubrir?
-Non falariamos de parada, porque son nove meses. Hai que poñer en marcha un plan excepcional de axuda financeira para que as empresas poidan aplicar expedientes de regulación de emprego e teñan axudas que lles permitan soportar a parada ata que en 2012 recuperemos a normalidade, que é o que agardamos.
-Entón, as probabilidades de amarre son moi altas?
-Todas, porque as cotas son as que son e é moi probable que non pasemos do primeiro trimestre, sendo xa moi optimistas. Así que, a ver se o Goberno pon as pilas e comeza a traballar porque deixou á flota sen posibilidades de pesca pola súa neglixencia nas negociacións do Consello de Ministros.
-A única boa nova cal é, que este ano se revisará o plan de recuperación da pescada?
-Si, pero é unha boa nova diluida porque en 2009 xa dixemos que había motivos para revisar o plan e o ano pasado dixémoslle á Administración que pedira excepcións ao plan para que a flota puidese traballar o máximo de días posible. Sen embargo, o Goberno segue sen facer os deberes e pola súa culpa castigan ao sector pesqueiro.
-Coa redución de esforzo, este ano quedaríanlles 142 días de faena. Cómo se pode rentabilizar así a actividade?
-É imposible, estamos cunha cantidade de contrasentidos... Redúcennos días de esforzo, cota, e apretan a flota de tal maneira que a levan a un lugar sen retorno, ao peche. Podiamos ser pioneiros cunha flota renovada, punteira, e ímola arruinar para perder postos de traballo, riqueza e soberanía alimentaria.
-Cre que o Goberno non defende ben ao sector?
-Levamos varios anos sufrindo recortes e o Executivo reitérase ano tras ano nos mesmos erros, e agravándoos ainda máis. Cambiaron a ministra e o secretario pero semella que non é un problema deles senón de cambiar o concepto co que imos a Bruxelas, co que defender ao sector. Hai que mollarse e non ir ás reunións e dar por ben feito todo o que se pon enriba da mesa.
-Sen embargo, o Goberno dixo que saiu satisfeito do Consello de Ministros. Como calificaría vostede o resultado?
-Foi un absoluto desastre. Debemos ser o faime rir de Europa. O resto de países, vendo as cotas que lle quedaron a España e escoitando á nosa ministra e á nosa secretaria, dirán: 'estes señores ou non teñen nin idea ou son uns hipócritas'.
-Vostede, tras o reparto de cupos, dixo que lle meteran un gol a España co tema do lirio. Ségueo mantendo?
-Si, metéronlle un gol pola escadra. O problema é que ese gol, se tivesemos porteiro, igual o paraba. Pero resulta que deixamos a portería baleira, non había quen tentara parar o tiro. Nas actas do Consello, cando se tratou o tema do lirio, España non se opuxo. Se o queren facer peor non lles sae. Hai uns anos que a Administración española cando vai a Bruxelas o único que fai é vender ao sector. Igual hai terceiros países moi interesados no noso mercado, por ser grandes consumidores de peixe, que están a aplaudir ao eliminar a un competidor.
-A que cre que se debeu o fracaso da negociación, á falta de experiencia da ministra e da secretaria xeral do Mar nesas lides?
-A ministra non tiña experiencia pero hai un equipo detrás que leva anos indo a Bruxelas, polo que alguén tiña que velo. Xa vemos que ese equipo é dos que lle meten goleadas de 15 para arriba todos os anos, o máis goleado da liga. O Goberno meteunos neste problema e é quen ten que sacarnos porque non bloqueou unha proposta que supón a ruína da flota do Cantábrico.
Link: www.laopinioncoruna.es
